"Москвадагы хостелде акысыз жашап жатышкан". Казак-Орус чек арасында калып калган кыргыздар боюнча элчиликтин билдирүүсү

Орусиянын Москва шаарында хостелдерде акысыз жашаган кыргыздар бардык эскертүүлөргө карабастан, чыгып кетишкен. Бул тууралуу Кыргыз өлкөсүнүн Орусиядагы элчилигинен кабарлашты.

Буга чейин Оренбургда эмгектенген мигранттар март айында Москвадагы хостелдерге жайгаштырылган.

"29-марттан бери хостелде акысыз жашап жаткан жарандар элчиликтин, диаспоранын эскертүүлөрүнө карабастан Казакстан аркылуу мекенге кайтабыз деген максатта чыгып кетишкен. Алар Соль-Илецк шаарында Казак-Орус чек арасы аркылуу жарандарды өткөрүп жатыптыр деген кепти угушкан. Биз аларга чек арадан 16-марттан бери күтүп жаткан жарандарды гана өткөрөрүн бир нече жолу эскерттик", - дейт мекеменин басма сөз катчысы.

Кечээ, 7-майда мекенге кайтып келе жаткан 70ке чукул кыргыздар Казак-Орус чек арасында калып калышканы кабарланган.