"3 аскердин абалы оор". Кыргыз-Тажик чек арасынан чыккан чырдан жаракат алган аскерлердин абалы айтылды

8-май күнү Баткен облусундагы Кыргыз-Тажик мамлекеттик чек арасында чыр чыгып, ок атышуу болуп, 3 аскер жабыр тартканы маалымдалган. Саламаттыкты сактоо министрлиги жабыр тарткан 3 аскердин абалы боюнча маалымат берди.

"Кечээ, 8-майда Баткен облустук биргелешкен ооруканасына жаракат алган 4 ( 3 аскер кызматкери, 1 тургун) жабырлануучу түшкөн. Алардан 3өө ооруканага жаткырылып, бирөөнө алгачкы медициналык жардам көрсөтүлгөн соң абалы канааттандырарлык болуп, үйүндө дарыланууга чыккан.

Бүгүнкү күндө төмөнкү жарандар ооруканада жатат:

1. Жабырлануучу С.у.М. 1994-жылы туулган. Диагнозу: кыр арканын көкүрөк тушуна ок атуудан алган жаракаты, курсак жана жамбаш сөөгүнүн ок атуудан тийген жаракаты. Ага операция жасалган, абалы өтө оор.

2. А.у.М. 1995-жылы туулган. Диагнозу: Көкүрөк тушуна ок жеген. Операция жасалган. Абалы оор, туруктуу.

3. Т.у.Ч. 1996-жылы туулган. Диагнозу: Көкүрөк тушун ок тешип өткөн. Жараатка алгачкы хирургиялык тазалоо жүргүзүлгөн. Абалы оор, туруктуу.

Жабырлануучулардын баары медициналык көзөмөлдө, дары-дармектер, кан компоненттери жетиштүү өлчөмдө бар.

Ош облус аралык биргелешкен ооруканадан Баткен облусунун биргелешкен ооруканасына нейрохирург, торакалдык хирург жана реаниматолог баш болгон дарыгерлер бригадасы келген", - деп жазылат маалыматта.