Ысык-Көл. Каракол шаарында жаңы мектеп ачылды

Бүгүн, 3-сентябрда Каракол шаарындагы Восход кичи районунда №15-жаңы орто мектептин ачылыш аземи болду. Бул тууралуу өкмөттүн облустагы өкүлүнүн басма сөз катчысы билдирди. Маалыматка таянсак, аталган мектептин курулушу 2008-жылы башталып, республикалык бюджеттин эсебинен салынган. Окуу корпусу 422 окуучуга ылайыкталган. Бүгүн мектеп 1-класстан 11-класска чейин окуучуларды кабыл алды. Мектептин курулушуна 34 миллион сом кеткен. Окуу класстары тиешелүү эмеректер менен толук камсыз болгон. Кошумчалай кетсек, учурда Ысык-Көл облусунда 189 мектеп бар. Бүгүнкү күндө 12 мектептин курулуш иштери жүрүүдө. Облуста жалпы 6800 мугалим эмгектенет жана 83 400 окуучу билим алат.