"Жол салсаң да жейсиң, үй салсаң да жейсиң...". Рэп аткаруучу Бегиштин саясатчыларга арналган эмгеги жарык көрдү

Рэп аткаруучу Бегиштин "Саясат" деген аталыштагы жаңы эмгеги жарык көрдү. Анда өлкөдөгү чек ара маселеси, медицина кызматкерлеринин абалы, коррупция, айтор, көйгөйлүү маселелер айтылат. Ыр элдин үнүн таамай чагылдырыптыр деп жакшы колдоого алынууда. SUPER.KG порталы рэпер менен байланышып, чыгарманын жаралышы тууралуу сурады.

"Акыркы кезде кайсы социалдык баракчага кирбейин элдин кыйналып жатканын көрөм. Учурдагы окуя абалды ого бетер курчутуп салды. Ошонун баарын ойлонуп, кайгы басып отуруп, эки сааттын ичинде ырдын сөзүн жаздым. Андан соң кандай кылып чыгаруу керектигин, идеяны ойлоп чыктым. Эртеси күнү үн жаздырып, бир күндө клипти тарттык. Клипке белгилүү блогер Болот Ибрагимов тартылса жакшы болмок деп ойлонуп, Инстаграм аркылуу жазып, сунуштадым. Ал ырды угуп жактырып, тартылууга макулдугун берди. Клипти ишке ашырууда эң оору мотоциклди табуу болду. Мотоцикл саткан кыргыз байкелерге канча чалып, сурадым, "мага кызыгы жок, андайдын мага кереги жок" деп болбой жатышты. Акыры Токмокто автомектепте иштеген Володя деген мырзанын мотоциклин таптык. Ага чалып, клиптин идеясын айтсам дароо эле "Бекер алып, каалаганча тартсаң болот, мен патриотмун да, мындай нерселерди колдойм" деп маселе жаратпай берип койду. Анвар Халмурзаев деген кичинекей кезден билген таанышым бар, ошол клипти тартты", - деп билдирди Бегиш.