"Коронавирус жок деген туура эмес. Адамдар ооруп, каза болуп жатышат". Үсөнбаев вирустун бар экенине ишенбей жатам дегендерге жооп берди (видео, хронология)

Министрдин орун басарына "өлкөдө "вирус жок, ишенбейбиз" дегендерге эмне деп жооп бере аласыз?" деген суроо берилди. 

"Коронавирус деп дүйнө жүзү дүңгүрөп жатат. Ооругандар бар. Каза болуп жатышат. Биз коркунучтуу жагдайларды көрүп жатабыз. Вирус жок дегенге кошулбайм. Антип айтсак дагы факты менен сүйлөсөк", - деди Үсөнбаев.

"Бет кап кийбей жарандарыбыз көчөгө, коомдук жайларга чыгып жатышат. Бул туура эмес. Биз коомдук тартипти сакташыбыз керек. Биздин азыркы аракеттин баары андай болсо текке кеткени да. Андыктан биринчи өзүңөрдүн жакындарыңарды эске алуу менен эрежелерди сактагыла", - деп кайрылды орун басар.

"Бүгүнкү күндө 3 миңге жакын объект текшерилди. Алардын арасында эрежелерди сактабай жаткандар бар. Кечээ, 9-майга карата 170 миң сомго жакын тейлөө жайларга айып салынды. Эрежелерди сактагыла", - деди Үсөнбаев.

"Соль-Илецк шаарынан келгендер обсервацияга алынгандан кийин медицина кызматкерлери менен түшүнбөстүктөр орун алды. Биз мындан улам милиция кызматкерлерин ал жакка чакырганга туура келди. Кээ бир мекендештерибиз обсервациядан качып кетүүгө да аракет кылды. Биз аларга жакындары үчүн бул кооптуу экенин түшүндүрүп жатабыз", - деди министрдин орун басары.

10-майга карата өлкөдө COVID-19 вирусун жуктурган 1002 адам катталды.
Стационарда – 260; алардын ичинен жандандыруу бөлүмүндө – 4;
Ооруканадан чыгарылды – 675;
Каза болгондор – 12.

Соль-Илецк шаарынан алып келингендердин арасынан жалпысынан 55 кишиден коронавирус чыкты.

Оор абалда 9 жаран жатат. Анын төртөө жандандыруу бөлүмүндө.

Бир суткада 1 медицина кызматкери коронавирус жуктуруп алды.

2020-жылдын 10-майына карата республика боюнча СOVID-19 инфекциясынын жаңы 71 адам жуктуруп алды.

Вирус аныкталгандар:

Бишкек шаары - 2;
Чүй облусу - 56 (алардын ичинен 55и Соль-Илецк шаарынан келгендер);
Жалал-Абад облусу - 5;
Ош облусу - 3;
Баткен облусу - 4;
Нарын облусу - 1.

Республика боюнча: 1002.

Бир сутка ичинде 17 бейтап ооруканадан айыгып чыкты. Айыккандар:
Бишкек шаары - 7;
Ош шаары - 5;
Нарын облусу - 4;
Жалал-Абад облусу - 1.
Республика боюнча бүгүнкү күнгө чейин жалпы 675 бейтап айыгып, ооруканадан чыгарылды.