"Эл ачка калганы үчүн мекенге кайтып жатат". Оренбургдагы Бузулук районунда калып калган кыргыздар чатырларда жашап жатышат

7-майда мекенге кайтып келе жаткан 70ке чукул кыргыздар Казак-Орус чек арасында, тактап айтканда, Оренбург облусунун Бузулук районунда калып калышканы кабарланган. Чек арадан өтө албай калган мекендештердин маселеси чечилип, алар балдар лагерлерине убактылуу жайгаштырыларын Кыргыз өлкөсүнүн Орусиядагы элчилигинен билдиришкен.

Бүгүн, 11-майга карата Бузулук районундагы кыргыздар ээн талаада 5 күндөн бери калып, чатырларда жашап жатышат. Бул тууралуу өлкөгө кайтам деп чек арада калып калган мекендешибиз тарабынан белгилүү болду.

ОРУСИЯДАН ЭМНЕГЕ КЕТИП ЖАТЫШАТ? ЭЛ АЧКА КАЛДЫ

- Биз отурган автобусту полиция кызматкерлери токтотушуп, айдоочуну артка кайтарган. Биз өлкөгө кайтабыз деп түшүп калып, жөө дагы бастык. Учурда Оренбург облусундагы Бузулук районунун кире беришиндеги талаадабыз. Ал жакта 4 күн болдук, эртеси күнү орустар бизге чатырларды алып келип, тигип беришти. Башында 55 киши чек арада калып калганбыз, аркабыздан дагы мекенге кайтабыз дегендер келип, азыр 200дөй кыргыз топтолуп калдык. Өлкөгө кайтабыз дегендер автобустар менен, айрымдары өздөрүнүн унаалары менен дагы жолго чыгышкан.

Баарыбыз кыргыз жергесине кетебиз деп жатабыз. Орусиядан эмнеге кетип жатышат? Орусияда азыр жумуш жок. Эл ачка калды. 10-20 жыл мурда барып, буттан туруп алгандардын жашоосу жеңил болушу мүмкүн. Бирок 1 жыл, жарым жыл, 2-3 ай мурда баргандардын баары ижарага батир алышып жашачу. Алардын топтогон каражаты жок.

Учурда тамак-ашыбыз бир аз бар. Ушул аймактагы армян, өзбек, тажик балдар тамак-аш берип жатышат. Элчиликтен, диаспорадан тамак алып келишкен. Андан кийин элчиликтен эч ким келген эмес. Орустар бизге чатырларды бере баштаганда Оренбургдагы консул келип кетти, бирок жардам жок. Ал эми бизди бул аймактагы балдар лагерине убактылуу жайгаштырабыз деген боюнча такыр сөз болгон эмес. Бул элчиликтин адаттагы эле шылтоосу. Биз бийликтин гана жообун күтүп жатабыз.

"БИЗДИН КӨПТӨГӨН КАЙРЫЛУУЛАРЫБЫЗДАН КИЙИН КОРКУТУУЛАР БОЛДУ, АЧКА КАЛДЫК"

Чек аралардын жабык экенин билип туруп жолго чыгууга эмне себеп болду деп кызыгып көрдүк.

- Жолго чыгууга себеп - биз хостелде убактылуу жашадык. Новосибирсктен, Екатеринбургдан, Түркиядан, Бириккен Араб Эмирликтеринен кыргыздарды алып кетип жатышат. Биз Москвадагы элчиликке кайрылсак, эч кандай жооп болбоду. Аэропортко барып 5 күн түнөдүк, президентке кайрылдык, жооп болбоду. Аргабыз түгөнгөндө Орусиянын президенти Владимир Путинге кайрылдык. Ошондо элчиликтин намысы ойгонуп кетти, бизге кысым көрсөтүштү. Белгисиз балдар келишип, кайрылуу жасаган балабызды коркутту. Тамак берүүнү токтотту. 5 күн күттүк, жыйынтык болбогондуктан бешинчи күнү автобус жалдап жолго чыктык.

"МЕКЕНГЕ КАЙТАБЫЗ ДЕГЕНДЕРДИН АРАСЫНДА ИШ САПАРЫНА, ДАРЫЛАНУУГА БАРГАНДАР ДАГЫ БАР"

- Өлкөгө кайтабыз дегендердин баары эле мигранттар эмес. Арасында иш сапарына, дарыланууга жана башка убактылуу зарылчылыктар менен баргандар бар. Мисалы, мен дарылануу үчүн 2019-жылдын 15-декабрында барып, 11-мартта ооруканадан чыктым. 17-мартта жеңил унаа менен жолго чыксак, чек ара жабылып калыптыр. Кайра Москвага барып 20-мартка учакка билет алдык, бирок ал каттам учпай калды. Ошону менен калып калдык. Мен аритмия (жүрөктүн согуу ритминин бузулушу) менен жабыркайм. Жанымда жубайым бар, мени карап жүрөт.