Туулган күн ээлерин куттуктап, үйсүз адамга жардам берип. Социалдык тармактын колдонуучулары комендантка ыраазычылык билдиришти

25-марттан бери Бишкек шаарына өзгөчө абал киргизилип, аны менен кошо борбордо коменданттык саат орун алган. 40 күндөн ашык бул кызматты аркалаган комендант, ички иштер министринин орун басары Алмазбек Орозалиевди бул убакыт ичинде сындагандар да, мактагандар да болду.

Ал күн сайын түз эфирге чыгып элге Бишкектеги абал тууралуу маалымат берип жатты. Коменданттык ишин баштагандан бери социалдык тармактарда баракча ачып, эл менен тыгыз байланышта болду.

Ал түз эфир учурунда туулган күн ээлерин куттуктаганы жана географияны мыкты билген үйү жок жаранга кичине болсо да жардам көрсөткөнү менен элдин эсинде калды.

Бүгүн, 11-майдан тарта коменданттык саат алынды, муну менен коменданттын жумушу соңуна чыкты. Социалдык тармактардын колдонуучулары комендантка ыраазычылыгын билдирип, аны менен жылуу коштошушту.

Айрым колдонуучулар комендантты 1980-жылы ал кезде Советтер союзунда өткөн Олимпиада оюндарынын символу болгон мамалакка салыштырып, сүрөт жасашкан.