Вице-премьер: "Билим берүү тармагында эмгек акы аз болгондуктан квалификациялуу кадрлар кетип жатышат"

Билим берүү тармагында эмгек акы аз болгондуктан квалификациялуу кадрлар кетип жатышат. Бул тууралуу бүгүн, 11-майда Жогорку Кеңештин комитет жыйынында вице-премьер-министр Аида Исмаилова билдирди.

"Мектепте жана мектепке чейинки билим берүү системинде иштөөнү каалаган жаш адистер азаюуда. Мугалимдердин эмгек акысы көбөйтүлгөнүнө карабастан ал мурдагыдай эле өлкө боюнча орточо эмгек акынын өлчөмүнөн аз. Экономиканын реалдуу секторундагы орточо эмгек акыдан аз жана ЕАЭБ өлкөлөрүндөгү тийиштүү эмгек акыдан 3 эсе төмөн.

Мектептердин дайыма кем каржыланышы окутуунун сапатына кесепетин тийгизүүдө. Мектептик билим берүүдө нормативдик каржылоо боюнча ар бир окуучуга чыгымдар бюджеттин каражатынан 87,6 пайызы гана жабылат. Башкача айтканда, 2016-жылы окуучуларды каржылоонун минималдуу стандарттарынын кемтигин жабуу 2 миллиард сомду түзгөн. Натыйжада мыйзамсыз акча чогултуу системи ого бетер кеңейип жатат.

Көп тилдүү окутуу боюнча программа иштелип чыкканына карабастан аны мектептерге киргизүү боюнча толук иш жүргүзүлбөй жатат. Республиканын региондорунда, айрыкча элетте чет тилдерди (расмий орус тилди, англис тилин) билүү деңгээли төмөн. Ал эми Бишкек шаарында кыргыз тилди билүү өтө начар. Ошондуктан эми алдыда, тагыраагы, өкмөттүн программасында балдардын көпчүлүгү толук баалуу мектепке чейинки билим берүү менен камтылган жана турмуштагы ийгилик үчүн эртелеп зарыл импульс алышат", - дейт Исмаилова.