Өкмөт: "Эл аралык валюталык фонду Кыргыз Республикасына 121 миллион доллар которот"

Эл аралык валюталык фонд 8-майда Кыргыз Республикасына 121 миллион доллар өлчөмүндө көмөктүн экинчи траншын жактырды. Бул тууралуу өкмөттүн басма сөз кызматынан билдиришти.

"Эл аралык валюталык фонддун биринчи траншы бюджеттин социалдык-маанилүү чыгымдарына пайдаланылган. Натыйжада, жалпысынан алганда Эл аралык валюталык фонддун линиясы боюнча көмөктүн өлчөмү 241 миллион 900 миң долларды түзөт.

5-майда Кыргыз Республикасы жана Азия өнүктүрүү банкынын COVID-19 пандемиясына жаңы жооп кайтаруу терезесинин алкагында Кыргыз өлкөсү үчүн 50 миллион доллар өлчөмүндө бюджеттик колдоо көрсөтүү жөнүндө келишимге кол коюлган.

Буга толуктоо иретинде Азия өнүктүрүү банкы Кыргыз Республикасын 2020-жылы колдоо үчүн аракеттер саясаты же башка насыя берүү негизинде максаттуу насыялоо аркылуу кошумча каржылоо маселесин карайт. Мындан тышкары 14-майда Азия өнүктүрүү банкы тарабынан пандемиянын саламаттыкка тийгизген кесепеттерин жумшартуу боюнча өлкөнүн дараметин жакшыртуу үчүн өзгөчө долбоордук жардам түрүндө 20 миллион доллар бөлүү боюнча расмий сүйлөшүүлөрдү жүргүзүү пландалууда.

Коронавирустун жайылуусу менен күрөшүү үчүн Бүткүл дүйнөлүк банктын 12 миллион 15 миң доллар суммасындагы каражаты жактырылды, ал боюнча тендердик процесс даярдалууда.

Европа бирлиги тарабынан бюджеттик колдоо түрүндө 30 миллион евро бөлүү маселеси каралууда. Ислам өнүктүрүү банкы аркылуу Кыргыз Республикасында COVID-19 инфекциясы менен күрөшүү максатында ишке ашырылып жаткан долбоорлордон 15 миллион доллар өлчөмүндө үнөмдөлгөн каражатты кайра бөлүштүрүү жана пайдалануу макулдашылды", - деп жазылат маалыматта.