Зомбулук көргөн аялдарды сындаган орусиялык телеалпаруучу Регина Тодоренко зомбулукка каршы күрөшкөн борборго 2 миллион рубль которду

"Үй-бүлө зомбулугуна аялдар өздөрү жеткириши мүмкүн" деген сөзүнөн кийин катуу сынга кабылган "Орёл и Решка" телеберүүсүнүн алпаруучусу Регина Тодоренко "Насилию.нет" үй-бүлө зомбулугуна каршы борбордун эсебине 2 миллион рубль которду. Бул тууралуу өлкөнүн жергиликтүү басылмалары жазып чыгышты.

Уюмдун социалдык баракчасына калтырган билдирүүсүнө ылайык, мындай көп суммадагы каражатты аларга буга чейин эч ким которгон эмес. "Ар бир адам адашат жана катачылыгын оңдой алат. Биз Регинага ыраазычылык билдиребиз. Бул каражат зомбулук көргөн адамдарга жардам берүүгө мүмкүнчүлүк түзөт жана биз мындан ары да Орусиядагы үй-бүлө зомбулугу тууралуу көйгөйдү көтөрүп чыга бермекчибиз", - деп жазылат билдирүүдө.

Эске салсак, буга чейин Регина Тодоренко басылмалардын бирине берген маегинде аялдар күйөөсүн сабаганга өздөрү жеткириши мүмкүн деген таризде оюн билдирген. Бул айтканы үчүн аны коомчулук "жеп" коё жаздап, бир нече компаниялар аны менен келишимди бузушкан.