Орусияда бет кап жүктөлгөн унаалар "кайым болду". Унааны жерлиги Кыргыз өлкөсүнөн болгон адамдар коштоп келе жаткан

Москвада медициналык бет каптар жүктөлгөн жүк ташуучу унаалар уурдалды. Бул тууралуу орус басылмалары жазып чыгышты.

Маалыматка ылайык, баасы 28 миллион рубль болгон бет каптар жүктөлгөн эки унааны жерлиги Кыргыз өлкөсүнөн болгон адамдар коштоп келе жаткан.

"Жүк Екатеринбург шаарынан келе жаткан. Жүк ташуучулар аны Солнечногорск шаарындагы кампалардын бирине чейин коштоп барышы керек болчу. Жолдон унааларды жол кыймылынын коопсуздугун көзөмөлдөөчү органдын кызматкерлери токтоткон. Ишкердин документтерин текшергиче анын бет кап жүктөлгөн унаалары жок болуп кеткен. Айдоочулар ишкер менен байланышка чыккан эмес", - деп жазылат маалыматта.

Азыркы тапта тиешелүү органдар иликтөө иштерин жүргүзүп жатат.

Алдын ала маалыматтар боюнча, унаалар катталбаган номерлер менен жүрүшкөн. Мындан сырткары аларды жолдон токтотуу кылмышкерлер тарабынан пландалган болушу мүмкүн.