"Коронавирус менен жашаганды үйрөнөбүз. Мурунку жашоо эми болбойт" дейт адистер

Дүйнөлүк саламаттыкты сактоо уюмунун коронавирусту көзөмөлдөө боюнча атайын өкүлү Дэвид Набарронун билдиришинче, дүйнөдө коронавирус пандемиясынан улам мурунку жашоо болбой калышы мүмкүн. Бул тууралуу чет элдик басылмалар жазып чыгышты.

"Коронавирус инфекциясы айрым жерлерде өзгөчө оор болуп жатканын билебиз. Бирок биз эс алууну, иштөөнү, пикир алышууну жана жакындарыбыз менен убакыт өткөрүүнү үйрөнөбүз. Чындыгында, бул биздин жашообуздун бир бөлүгү болуп калат. Дүйнө жүзүндөгү бардык калкты эмдөөдөн өткөрүш керек. Бул чоң долбоор. Ошондуктан мен бардыгына айткым келет, вакцина эки жарым жылдын ичинде даяр болот, даярдангыла", - деген Набарро.

Дүйнөлүк саламаттыкты сактоо уюмунун божомолуна ылайык, коронавирус ВИЧ инфекциясындай болот. Илимпоздор бул вирустан айыктыруунун ыкмаларын табышат. Бирок вирус жок болбойт. Уюмдун маалыматына ылайык, коронавирустун жайылышын толук көзөмөлгө алуу үчүн адамзатка кеминде беш жыл талап кылынат жана мындан ары мурункудай жашоо эми болбойт.

Дүйнөдө коронавирус инфекциясын жуктуруп алгандар күн сайын өсүүдө. Акыркы маалыматтар боюнча, дүйнө жүзү боюнча 4 миллион 444 миң 670 адамдан инфекция аныкталды. 302 миң 493 адам каза болсо, 1 миллион 588 миң 858 бейтап айыгып чыкты.