"Каттамды такыр жылдырып салабыз деп шарт коюшкандан кийин гана тынчышты". Орусиядан 378 жаран Бишкекке учуп келе жатат (видео)

Бүгүн, 17-майда азыркы тапта Орусиядан Бишкекке 378 жаран учуп келе жатат. Маалыматты жарандык активист Тимур Саралаев SUPER.KG порталына тастыктады.

Айтымында, тизмеге кирбей калган жарандар Шереметьево аэропортуна келип, тизме боюнча уча тургандарга тоскоолдук жараткан. Мындан улам каттам жолго чыгууда кечигип, жарандар арасында бир топ түшүнбөстүктөр орун алган.

"Жарандар арасында талаш-тартыш, таарыныч жаралып, түнкү саат 1де башталган каттоо процедурасы өтө эле созулуп кетип, эртең мененки 9да аяктады. Эртең мененки саат 07:40та уча турган борт 2 саат кармалып жолго чыкты. Биз максималдуу аларды 2 саатка жакын кармадык, толук киргизип алууну сурандык. Анткени каттоодо эки терезе иштеп, ага кайрылган ар бир жаран менен сүйлөшүүгө эле 15-20 мүнөт кетип калып жатты.

Бирок аэропорттун кызматкерлери жана учактын экипажы 9дан өткөн соң же биз учабыз калгандарды күтпөй же каттамды такыр жылдырып салабыз деп шарт коюшту. Мындан кийин гана алар аргасыз макул болгонго туура келди. Анын жыйынтыгында 23 киши каттоого үлгүрбөй калды.

Ал эми бир жараныбыз, борт жылаардын алдында дем ала албай жатканын айтып, өзү чыгып кетти. Ал 38 жаштагы аял киши, ал жаран кайра борт жылып кеткенден кийин кете турганын айтып, өкүндү. Эмнеси болсо да калган 378 мекендештерибиз аман-эсен жетип алып, обсервацияны да тынч өткөрүп алышсын", - деди кейиген жарандык активист.