Атактуу баскетболчу Майкл Жордандын кроссовкасы рекорддук суммага сатылды

Атактуу америкалык баскетболчу Майкл Жордандын оюнга кийген кроссовкасы аукциондо рекорддук суммага сатылды. Бул тууралуу америкалык "Bloomberg" басылмасы жазып чыкты.

Маалыматка ылайык, аукцион 8-майда башталып, 17-майда аяктаган. Аукциондун уюштуруучулары Жордандын кроссовкасын 150 миң долларга сатууну көздөшкөн. Бирок баскетболчунун бут кийими 560 миң долларга сатылган. Бул кроссовканы баскетболчу 1985-жылы "Чикаго Буллз" командасында ойноп жүргөндө кийчү.

2017-жылы Майкл Жордандын 1984-жылы Лос-Анжелес шаарында өткөн жайкы олимпиада оюндарында оюнга кийген майкасы аукциондо 274 миң долларга сатылып, рекорд койгон.

Майкл Жордан баскетбол тарыхындагы эң мыкты оюнчулардын бири болуп эсептелет. Ал АКШ курамасы менен 2 жолу олимпиада жеңүүчүсү болгон жана алты жолу Улуттук баскетбол ассоциациясынын (NBA) жеңүүчүсү аталган.