Москвада коронавирустан айыктым деген Кыргыз жараны: "17 күн жыт, даам сезбей калдым" (маек)

Орусиянын Москва шаарында жашаган мекендешибиз "ал жакта коронавирус инфекциясы менен ооругандар көп. Бирок ооруканага кайрылбай эле үйүндө сакайып кетип жатышат" дейт. Нурбек аттуу мекендешибиз SUPER.KG порталына үй-бүлөсү менен кантип ооруп, сакайып чыкканын айтып берди.

"Үйдө баарыбыз ооруп чыктык"

- Мен Москвадагы коронавирусту дарылоо үчүн курулган оорукананын курулуш иштерине катышкам. Ал жакта 8000ге чукул адам чукул арада курулушту бүтүргөнбүз. Албетте, көп киши болгондуктан, санитардык эрежелер да, аралык да сакталган эмес. Апрель айында жумушту тапшырып, үйлөрүбүзгө тараганбыз. Айдын ортосунан баштап ооруп калдым. Чынында, суук тийип калганбы деп эле ойлогом. Жөтөлүп жаттым, даам, жыт сезбей калдым. Дене табым 37,5 градус болуп, андан көтөрүлгөн жок. Вируска каршы ремантадин дарысын, дене табымды түшүрүү үчүн парацетамол ичип баштадым. Мага каралашып, чай берип жүргөн карындашым менин артымдан ооруду, анын артынан күйөө балам, анан апама өттү. Баарыбыз суюктук, кайнатма шорпо ичип жаттык, имбирь, лимон кошуп чай ичтик, сарымсак, пиязды аарчып бөлмөлөргө коюп салдык. Москвада мындай абалга туш болгондор көп эле болду. Байкасам, коронавирустун жеңил түрүн иммунитети күчтүү адамдар кадимки сасык тумоо катары ооруп, жеңип кетет экен. Бизде да ошондой болду окшойт. Өзүбүз жакшы болуп кетерибизге ишендик, ошондуктан ооруканага барган да жокпуз. Азыр Кудайга шүгүр сакайып калдык. Жөтөл жоголгондон кийин деле көпкө алсырап жүрдүк. Мен 17 күн дегенде толук калыбыма келдим.

"Москвада ооруган мекендештер көп. Бирок ооруканага кайрылбай эле сакайып жатышат"

- Менин билишимче, Москвадагы мекендештердин көбү эле коронавирус менен ооруп, үйдөн сакайып жатышат. Ооруканага кайрылбаганынын да себеби бар. Бул жактын шарты көпчүлүккө белгилүү, бир батирде көп адам жашагандыктан, кийин маселе жаралбасын дешет окшойт. Ошол эле учурда досторум ооруп, "Тез жардам" чакырса деле дарыгерлер келип алып кетпей жатыптыр деп айтышты. Айтор, оорунун жеңил түрүндө үйдөн эле дарыланып, сакайып алса боло турганын түшүндүм.