АКШ коронавируска каршы вакцина адамдарда ийгиликтүү сыналганын жар салды

АКШдагы "Moderna, Inc." клиникалык-биологиялык компаниясы 18-май күнү mRNA-1273 вакцинасын адамдарга сыноонун биринчи этабын ийгиликтүү өткөнүн жар салды. Бул тууралуу чет элдик маалымат каражаттары жазып чыгышты.

Маалыматка караганда, сыноого катышкан адамдардын сегизинен коронавирустун жайылып кетүүсүн чектөөгө алган антителалар табылган. Мындай антителалар Covid-19 менен ооруп, айыккандарда гана болору аныкталган.

Вакцинаны адамдарда массалык түрдө сыноо июль айында башталат. Жогоруда аты аталган компания алгачкылардан болуп дарыны адамдарда сынай баштаган.

Изилдөөлөр ар кандай жаштагы адамдардын топторунда жүргүзүлгөн. Алар 25, 100 жана 250 микрограммдан дары алышкан. 43 күндөн кийин дарыны колдонгон адамдардын дээрлик баарында вируска каршы антителалар табылган. "Аталган препарат өзүн коопсуз жана көпчүлүк көтөрө ала тургандыгын көрсөттү", - деп билдиришкен компаниядан.

Бир гана адамда дары сайылган жери кызарып чыккан, бирок көп өтпөй ал өзү эле кетип калган.