1 күндө эки өзгөргөн статистика. "Соль-Илецктен келип, коронавирус тастыкталгандардын саны 58 эмес, 47" дейт министрлик

7-май күнү Соль-Илецктен келип, “Семетей” обсервациясында жаткан жарандар тууралуу саламаттыкты сактоо министрлигинен маалымат таратышты.

13 күн мурун, 7-майда Соль-Илецктен 541 жаран келген. Алардан COVID-19 вирусу 104 жаранда тастыкталган.

Алардын ичинен:

Стационардан айыгып, чыккандардын саны - 47;

Учурда стационарда дарыланып жаткандардын саны - 57.

Жакын байланышта болгондор катары обсервацияда калгандар - 19.

Үй карантинине чыгарылгандардын саны - 465.

Бүгүн эртең мененки брифингде саламаттыкты сактоо министринин орун басары Нурболот Үсөнбаев Соль-Илецктен келип, коронавирус аныкталган 101 адамдын арасынан 58 жаран үй карантинине чыгарылганы тууралуу маалымат берген. Ага "Ошондо Соль-Илецктен келгендердин ичинен үй карантинине чыгарылгандардын саны 421 болдубу же 479 болдубу?" деген тактоо иретинде кайталанган суроо берилди. Бул учурда министрликтин өкүлүнүн ачуусу келип: "Дагы бир жолу кайталап айтайын, үй карантинине 479 жаран чыгарылды", - деп жооп берген. Көп өтпөй республикалык штабдан стационардан айыккандардын саны 47, ал эми үй карантинине чыгарылгандардын саны 465 деп маалымат таратышты.