"Жат дегенде жатпасаңар, убактылуу кармоочу жайдан обсервация ачып коёбуз". Өкмөттүн Талас облусундагы ыйгарым укуктуу өкүлү кайрылуу жасады

Өкмөттүн Талас облусундагы ыйгарым укуктуу өкүлү Марат Мураталиев обсервацияга жатуудан баш тартып, чыр чыгаргандарды убактылуу кармоочу жайынан изоляция зонасын ачып, ошол жакка киргизип коюу керек дейт. Бул тууралуу ал аксакалдарга карата видеокайрылуусунда айтты. Анда Мураталиев жарандарга кайрылып, үйүңөрдө отурганыңар бизге чоң жардам болот дейт.

"Биз силерден үйдө отурууну суранабыз. Күнү-түнү иштеп жүргөн акимдер, шаар мэри, укук коргоо кызматкерлери, дарыгерлер үйлөрүнө барбай иштеп жүрүшөт. Алар үйлөрүнө баруудан коркуп жатышат. Алардын үй-бүлөсү, жакындары, балдары жок бекен? Эмнеге коркунуч жаратып жатасыңар?

Кечээ "Манас" лицейинде ачылган обсервацияга барсак, дааваттан келгендер "эмнеге сүлгүсү жок келишим керек" дейт. Жат дегенде жатпасаңар, милициянын убактылуу кармоочу жайынан обсервация ачып коёбуз, ошол жакка жатасыңар анда. Ошондуктан ынтымакка келели.

Анан дагы WhatsApp аркылуу ар кандай провокацияга алдырган билдирүүлөрдү таратканды токтоткулачы. Республикалык штабдын чечими чыккан, ким провокацияга чакырык таштаган болсо ири көлөмдө айып пул төлөйт. Токтоткулачы! Үйүңөрдө болуп, эч ким менен байланышта болбой тургулачы. Урматтуу аксакалдар, апалар, балдарыңарга айткылачы.

Жакында абанын температурасы жогорулайт, вирустун жайылуусу басаңдайт. Илдет жок болсо биз сиздерге айтабыз", - дейт Мураталиев.

Ошондой эле өкмөттүн ыйгарым укуктуу өкүлү өзү жана анын орун басарлары дайыма вируска анализ тапшырышарын, эрежелерди сактай турганын кошумчалады.