Кыргызстанда көзү азиздер үчүн Чыңгыз Айтматовдун 2 повести Брайль шрифтинде китеп болуп басылып чыкты

Кыргызстанда көзү көрбөгөн жана начар көргөн жарандар үчүн Чыңгыз Айтматовдун 2 повести Брайль шрифтинде китеп болуп басылып чыкты. Бул тууралуу депутат Дастан Бекешев билдирди. Айтымында, “Биринчи мугалим” жана “Бетме-бет” повесттерин чыгарууга кеткен 26 миң сомду социалдык тармактардын колдонуучулары беришкен. Бардыгы болуп 2 чыгармадан 10 даанадан чыгарылган. Көзү азиздер үчүн атайын китепкананын жетекчиси Жумабай Исмаиловго 12  китеп, Көзү азиз жана начар көргөн балдардын Республикалык атайын жатак-мектебинин директору Калиман Урсеитовага 2 китеп берилген. Калган китептер Ош шаарындагы көзү азиз жана начар көргөн балдардын мектебине берилет. Эске сала кетсек, май айында Брайль шрифти менен Чыңгыз Айтматовдун “Жамиля” повести чыгарылган.