Балдар ойноп жатып чоң атасынын үйүнөн 2 килограмм алтын таап алышкан

Францияда карантин маалында чоң атасынын үйүнө келген неберелери ойноп жатып, 100 миң еврого бааланган 2 килограмм алтын куйманы таап алышкан. Бул тууралуу чет элдик басылмалар жазып чыгышты.

Орточо 10 жаш курактагы балдар шейшептерден үй куруп ойнойбуз дешкенде чоң атасы неберелерине чоң энесинин колдонулбай калган шейшебин алып берген. Балдар ойноп жатып шейшептин арасынан оор нерсени таап алышкан. Бирок ага маани бербей ордуна коюшуп, бир нече сааттан кийин гана атасына айтышкан. Атасы каза болгон чоң энесинин буюмдары болсо керек деп ойлоп караса, ар биринин салмагы 1 килограммдан болгон эки куйма алтын болгон.

Карантин бүткөн соң табылганы алып үй-бүлө экспертке барышкан. Эксперт куйма чын эле алтындан экендигин тастыктап, ал 1967-жылы эле алынганын айткан.