"Депутаттын иниси вирусту Токтогул районунан жуктурганбы?". Буга облус башчысы жооп берди

Бүгүн, 21-майда өкмөттүн Жалал-Абад облусундагы ыйгарым укуктуу өкүлү Нурболот Мирзахмедов онлайн маалымат жыйынын берди.

Жыйындын жүрүшүндө Мирзахмедовго "Жогорку Кеңештин депутатынын иниси коронавирус жуктуруп алганы айтылып жатат. Ал киши Токтогул районунан жуктурган деген маалыматтар бар" деген суроо берилди.

Буга өкмөттүн Жалал-Абад облусундагы ыйгарым укуктуу өкүлү төмөндөгүдөй жооп берди:

"Негизи бизде ооруган адамдын аты-жөнү айтылбайт. Ошого байланыштуу ал депутаттын иниси же жокпу деген суроо боюнча так маалымат бере албайм. Ошол эле мезгилде Токтогул районунун тургуну болгон жаран вируска чалдыккан. Ал Орусиядан чоң жүк ташуучу унаа менен келип, Талас облусу аркылуу өткөн. Ал жактан ПЦР-анализ тапшырганда, андан коронавирус аныкталган. Бирок анын унаасында тез бузулуучу азыктар болгондуктан, ал жерден коё берилген. Токтогул районуна келип, 26 адам менен байланышта болгон. Бүгүнкү күндө ал 26 адам такталып, үй карантинине алынды. Ал эми вирус аныкталган жарандын өзү Жалал-Абад шаарындагы жугуштуу оорулар ооруканасына жаткырылды", - деди Нурболот Мирзахмедов.