Апта ичинде санитардык талаптарды аткарбаган 53 жайга айып салынды. Арасында тыюу салынганына карабай иштеп жаткан кафелер бар

Бишкек шаардык мэриясы бир апта аралыгында 53 ишканага санитардык талаптарды аткарбагандыгы үчүн протокол түзүлгөнүн маалымдады. Анда айтылгандай, жалпысынан аларга 209 миң сомдук айып салынган.

Мэриянын алдындагы санитардык-экологиялык инспекция шаардагы мындай жайларга карантин учурунда рейд жүргүзгөн. Анын алкагында санитардык патруль Pierre Coffee жана Istanbul кафелеринин толук кандуу иштеп жатканына күбө болгон.

"Istanbul кафесиндегилер санитардык-экологиялык инспекциянын өкүлдөрүн киргизүүгө каршылык да кылышкан. Эки кафеде тең санитардык нормалар сакталган эмес, орундуктарда кардарлар отурушкан, аларды тейлеген кызматкерлер кадимкидей иштеп жүрүшкөн. Азырынча кафе, ресторан, тез татым жайлары тамак-ашты жеткирип берүү жолу менен гана иштегенге уруксат. Кафелердин кожоюндарына карата протокол түзүлдү. Ага ылайык, юридикалык жактарга 13 миң сомго чейин, жеке жактарга 3 миң сомго чейин айып салынат", - деп айтылат мэриянын маалыматында.

Учурда аталган инспекция тарабынан шаар ичинде рейд жүргүзүү улантылууда.

Биринчи вице-премьер-министр Кубатбек Боронов коомдук тамактануучу жайлар 25-майдан тартып иштей баштай турганын маалымдаган.

"25-майдан баштап 50дөн ашпаган адамга ылайыкталган коомдук тамактануучу жайлар, кафе, ресторандар, жайкы кафелер иштесе болот. Бул жерде талап - ар бир столдун аралыгы 1,5-2 метрди сакташы керек. Чакан тамактануучу жайлар - фуд-корддордун иштөөсүнө тыюу салынат", - деген ал.