"Чет жактагы Кыргыз жарандарынын паспортторунун мөөнөтү өтүп кеткендер штамп койдуруп, узартып алса болот" дейт Мамлекеттик каттоо кызматынын төрагасы

Чет жакта жүргөн Кыргыз жарандарынын арасында паспортунун мөөнөтү өтүп кеткендер болсо, штамп койдуруп, узартып алса болот. Бул тууралуу бүгүн, 22-майда Мамлекеттик каттоо кызматынын төрагасы Акын Мамбеталиев билдирди.

"Чет жактагы мекендештердин мөөнөттөрү өтүп кеткен паспорттору боюнча 19-майда 256-токтом чыккан. Ага ылайык, паспорттордун мөөнөттөрү 2020-жылдын 31-декабрына чейин узартылат. Ал үчүн жарандар Тышкы иштер министрлигинин бөлүмдөрүнө кайрылып, паспортторго штамп койдуруп алышы керек", - деди Акын Мамбеталиев.

Ошондой эле жыйында тышкы паспортторду жасоо боюнча жарыяланган тендердин жеңүүчүсү аныкталганы айтылды.

"Учурда келишим иштелип чыгып жатат. Жылдын аягына чейин паспортторду берип баштайбыз", - дейт Мамлекеттик каттоо кызматынын төрагасы.