Көлдө жылкылар коронавирус менен ооруп баштадыбы? Адис жооп берет (видео)

18-майда Ысык-Көл облусунун Түп районуна караштуу Михайловка айылынын тургунунун эки жылкысы өлгөн. Мындан улам социалдык тармактарга жылкыларда коронавирустун белгилери бар деген маалымат тарап, интернет желелеринде талкууга алынган. Ал эле эмес мессенжерлер аркылуу "Жылкынын этин тамак-ашка колдонбой тургула. Жылкыларда бир ылаң пайда болуп, турган жеринде бышылдап эле жыгылып жатыптыр. Кымызды дагы этияттагыла, айрыкча этти карызга берем деп келсе албагыла" деген билдирүүлөр менен кошо видео тараган.

Буга байланыштуу SUPER.KG порталы Ысык-Көл облусу боюнча ветеринардык кызматтын координатору Бакыт Шарапов менен байланышып, аталган ылаң тууралуу сурады. Адистин айтымында, жылкылардын ылаңына коронавирустун эч кандай тиешеси жок.

"Эки үч-жылдан бери жылкылар ооруп келген. Таза кандуу жылкы баккан мал ээлеринин 15-майда бир жылкысы ооруйт жана алар өздөрү өз алдынча дарылоо жүргүзүшкөн. Алар жылкысы ооруп, дарылаганга болбой калган учурда ошол жерден жылкынын абалын тартып, социалдык тармакка чыгарышкан. Ал видеону көрүп облустук, райондук дарыгерлер абалды изилдеп, ал жердеги жылкылардын баарын изоляцияга алып, ошол күнү алардын канын анализге жибердик. Буга чейин да 4-5 жылкы ооруган экен. Алардын да анализин алып, лабораторияга жиберсек, алар бир суткада анализди аныктап беришти.

Анализдин корутундусунда 4 жылкыдан ринопневмония, бир жылкыдан жылкылардын сасык тумоо оорусу аныкталды. Мына ошонун негизинде Михайловка айылына чектөө киргизилди. Бул чектөө аталган айылда абал турукташканга чейин, тагыраагы, 2 айга чейин созулат. Азыр ал жер мал доктурларынын көзөмөлүндө. Жергиликтүүлөрдүн айтымында, айылда жайгашкан көлмөнүн тегерегине жайылган жылкылар оору жуктуруп жатат деген божомолдор бар. Ал боюнча дагы териштирүү жүрүүдө. Буга байланыштуу жергиликтүү бийлик аталган жердин суусунан, топурагынан анализ алып, изилдөө кылышат.

Андан тышкары дагы бир үй-бүлөнүн жылкысы 18-майдан 19-майга караган түнү өлүп калган. Анда дагы өлгөн жылкынын органдарынан тиешелүүсүн алып, толук анализ алуу үчүн республикалык лабораторияга жөнөткөнбүз. Азыркы тапта ошол анализдин жыйынтыгын күтүп жатабыз.

Ал эми социалдык тармакта тараган калп маалымат. Жылкылар эч кандай коронавирус менен ооруган эмес", - деп билдирди Шарапов.