Ак-кыялыктар менен жергиликтүү бийлик ортосунда чыр чыкты. "Коронавирус аныкталган адамдар дарыланууга каршылык көрсөтүшкөн" дейт өкүлчүлүк (фото, видео)

Интернет желесине "Ак-Талаа районунун Ак-Кыя айылынын жашоочулары менен жергиликтүү бийлик ортосунда түшүнбөстүк жаралды" деген видео тарады. Видеодон топтолгон элдердин нааразычылык сөздөрүн угууга болот. Арасында "блокпостторду алгыла, керек эмес" дегендер бар. Мындан тышкары коргоочу каражаттарды кийип жүргөн адамга көпчүлүк жабылып, анын аракеттерине каршылык көрсөткөнү тартылган. "Тез жардам" кызматынын унааларын да көрүүгө болот.

Окуянын чоо-жайын билүү үчүн SUPER.KG порталы өкмөттүн Нарын облусундагы ыйгарым укуктуу өкүлчүлүгүнүн басма сөз кызматына кайрылды. Өкүлчүлүктөн видео 22-майда тартылганын, бүгүнкү күнгө карата абал жөнгө салынганын кабарлашты.

"Нарын облусунун Ак-Талаа районунан коронавирус инфекциясын 18 адам жуктуруп алган. Ак-Кыя айылынан 14, Баетов айылынан 2, Үгүт айылынан 2 адам. Райондогу оорунун очогу Нарын облустук төрөт бөлүмүндө илдетти жуктуруп алган 2 аял менен байланышта болгон адамдардан чыгууда.

Учурда вирус табылган адамдардын бардыгы райондук ооруканада изоляцияга алынды. Алар менен байланышта болгондор обсервацияда.

22-майда Ак-Кыя айылындагы вирус табылган 8 адам ооруканага жатып дарыланууга каршылыгын билдиришкен. Видео ошол учурда тартылган. Калган жашоочулар аларды колдоп чыгышкан. Жергиликтүү бийлик тарабынан түшүндүрүү иштери жүргүзүлүп, бардыгы ооруканага жаткырылды.

Ак-Кыя жана Көк-Жар айылдары курчалып, посттор коюлду. Мобилдик топтор ооругандар менен контакт болгондорду аныктап, анализдер алынууда. Баетов, Үгүт айылдары да курчоого алынган. Райондо абал туруктуу. Ооругандардын абалы канааттандырарлык", - деп билдирди маалымат катчысы Назгүл Мүсүралиева.