Кубалык кызды кардары барымтага алып, өлтүрүп, денесин жиликтеп салган

Москвада 22 жаштагы кубалык кызды кардары барымтага алып, талап кылган акча толук берилбеген соң өлтүрүп салган. Бул тууралуу чет элдик басылмалар жазып чыгышты.

Лоурен Моралес Фернандести 19-май күнү кылмышкер барымтага алып, кыздын телефонунан жакындарына 30 миң рубль берүүнү талап кылган. Эгер анын талабы аткарылбаса, кызды жиликтеп саларын айткан. Лоурендин тааныштары алгач 10 миң рубль жөнөтүшкөн. Кылмышкер опузалоону уланта бергенде жакындары полиция кызматына кайрылышкан.

24-май күнү Кастанаев көчөсүндөгү үйдө атайын операция жүргүзүлүп, кылмышкер кармалган. Бирок Лоурен үйдө жок болгон. Бүгүн, 25-май күнү кыздын жиликтенген денесин таштанды салынган идиштен табышкан.

Тергөөчүлөрдүн берген маалыматына ылайык, маркум кыз Москвада сойкулук менен алектенген. 19-май күнү чакыруу менен кардардыкына келип, ошол жактан барымтага алынган.