Ошто "Казак" деп таанылган уюшкан кылмыштуу топтун мүчөсү "зордуктоо" беренеси менен 10 жылга эркинен ажыратылды

Ош шаарында "Казак" каймана аты менен белгилүү уюшкан кылмыштуу топтун мүчөсү 10 жылга эркинен ажыратылды. Бул тууралуу Ош облустук сотунан билдиришти.

Маалыматка ылайык, 26-май күнү Ош шаардык сотунун өкүмү менен соттолуучу М.У. 161-берене "жашы жете электигин билип туруп зордуктоо" менен күнөөлүү деп табылып, 10 жылга эркинен ажыратылды.

Бул иш боюнча соттолуучуга карата бөгөт коюу чарасы катары тандалып алынган үй камагы түрү өзгөртүлүп, камакка алынуусу көрсөтүлгөн.

Эскерте кетсек, өкүм акыркы эмес жана нааразы тарап аппеляциялык тартипте Ош облустук сотуна даттанууга укуктуу.

Буга чейин кылмыш чөйрөсүндө "Казак" каймана аты менен белгилүү М.У. Ош шаарындагы "Скай-бар" түнкү эс алуу борборунда 23 жаштагы тургун менен сөз талаша кетип, аны миздүү нерсе менен желкесине жана оң каруусуна сайып, андан ары изин жашырып кеткен. Андан соң анын үстүнөн Ош шаарынын тургунунан арыз келип түшкөн. Анда 16 жаштагы кызды шектүү күч колдонуп, Ош шаарынын Манас-Ата кичи районунда зордуктап койгону жазылган. Ал эми 17-январда судья Айнура Сулайманованы ээлеген кызматынан мурда бошотуу жөнүндө жарлыкка президент кол койгон. Судья Айнура Сулайманова 8-январда уюшкан кылмыштуу топтун активдүү мүчөсү Умар Маратовду (Казак) үй камагына чыгарган. Анын мындай чечими коомчулукта чоң талкуу жараткан.