"Жаңы ГЭСтер курулбаса, кошуна мамлекеттерге көз каранды болуп калабыз" дейт Улуттук энергетикалык холдингдин башчысы

Кыргыз өлкөсүндө жакын арада жаңы ГЭСтер курулбаса, кошуна мамлекеттерге электр энергия жактан көз каранды мамлекетке айланабыз. Бул тууралуу "Улуттук энергетикалык холдингдин" башчысы Айтмамат Назаров маалымат жыйыны учурунда билдирди.

"Жаңы ГЭСтерди курушубуз керек. Себеби Кыргыз өлкөсүнүн керектөөсү жылына 5 пайыздын тегерегинде өсүп жатат. 2010-жылы жалпы керектөө 11-12 миллиард киловатт саат болсо, 2019-жылы бул керектөө 15 миллиард киловатт саатты түздү. Демек, жакын арада өзүбүздүн кубаттуулуктарды киргизбесек, башка мамлекеттерге көз каранды болуп калабыз. Алардан электр энергияны сатып алууга туура келет. Буга чейин биз чет мамлекеттерге ашыкча электр энергияны сатып келген болсок, азыр өзүбүздүн өндүрүш, өзүбүздүн керектөө менен теңелип калды", - деген Айтмамат Назаров.