"Ооруганга акым жокпу? Мен адам эмесминби?". Рамзан Кадыров коронавирус оорусу тууралуу үн катты

Коронавируска шектелип жаткан Чеченстандын башчысы Рамзан Кадыров дени сак экенин билдирди. Бул тууралуу ал орусиялык журналист Ахмед Дудаевдин Инстаграм баракчасындагы түз эфир аркылуу кабарлаган.

"Эгер мен оорусам дагы, дүйнө жүзүндө миллиондогон адамдар коронавирус менен ооруп жатат, андан 10 миңдегени каза болду. Мен эмне адам эмесминби? Ооруганга акым жокпу? Тамчылатма дары алып, иммунитетимди көтөргөнгө укугум жокпу? Мен толугу менен дени сак адаммын", - деген Кадыров.

Ошондой эле ал пандемия башталгандан тартып Грозныйда байма-бай текшерүүдөн өтүп турарын кошумчалаган. Ал эми Орозо айт майрамын ал үйүндө изоляцияда белгилегенин айткан.

Эске салсак, 21-май күнү Рамзан Кадыровдун коронавируска шектелип, Москвага ооруканага алынып келгени айтылган. Кийинчерээк аталган өлкөнүн парламентинин спикери Магомед Даудов президенттин ооруп жаткандыгы тууралуу маалыматты четке каккан.