"Акылдуусунбагыла, мен кардарларды кууп сала албайм!". Айыпка жыгылган "Хожа Насреддин" чайканасынын жетекчиси менен журналисттер ортосунда түшүнбөстүк пайда болду

Бүгүн, 29-май күнү Бишкек шаарындагы кафе-ресторандарга санитардык эреженин сакталуусун текшерүү үчүн рейд жүргүзүлгөн. Рейддин жүрүшүндө "Хожа Насреддин" чайканасында эрежелер, тартип сакталбагандыгы аныкталып, 3000 сом айып пул салынган.

Тартип бузган чайкананын жетекчилиги менен рейдге барган журналисттер арасында келишпестик келип чыккан. Маалыматка ылайык, журналисттер тартипти бузган чайкананын жетекчилигинен жабылуусун талап кылган. Ага жетекчилик "Силер адамсыңарбы же кимсиңер? Силерде тууган-урук, бала-чака жокпу? Акылдуусунбагыла, мен кардарларды кууп сала албайм, тамак-ашын жегенге мүмкүнчүлүк бергилечи" деп нааразычылыгын билдирген.

Ал эми шаардык мэриянын өкүлү чайкананын жетекчилиги 50 кишиден артык кардар кафеге кирүүгө болбойт деген эрежени "кафенин ичинде 50, сыртында 50 адам болушу керек деп түшүнүп алыптыр" деген.

Түшүндүрүү иштеринин жыйынтыгында чайкана эки сааттан кийин жабылмай болгон.