Индияда маймылдар коронавирус бар-жогун текшерген анализдин үлгүлөрүн уурдап кетишти

Индияда маймылдар коронавирус бар-жогун текшерген анализдин үлгүлөрүн уурдап кетишти. Мындан улам жергиликтүү калк бул окуя вирустун жайылышына жол ачат деп чочулоодо. Бул тууралуу дүйнөлүк ЖМКлар жазып чыгышты.

Маалыматка ылайык, уурулук Индиянын Мератх шаарында орун алып, анда маймылдар лабораториялардын бирине кирип, медициналык кызматкерге кол салуу менен бир канча анализдин үлгүлөрүн уурдап кетишкен. Ал анализдер коронавирустун бар-жогун текшерүү боюнча жүрүп жаткан.

Социалдык тармактарга тарап кеткен видеодо маймылдардын бири даракка чыгып алып, уурдап чыккан үлгүнү тиштегилеп жеп жатканы тартылып калган.

Анализдер уурдалган мекеменин башчысы маймылдарга баш-аягы үч кутуну алдырып жиберишкенин айткан. Анда канча даана тест бар экендиги айтылган эмес.