ЖЫЛНААМА, 31-май: "Супер-Инфо" гезити 18 жашта!

2002-жылы, 31-майда “Супер-Инфо” гезитинин алгачкы саны чыгып, эки жылдын ичинде алдыңкы гезиттердин катарына кошулган. Гезит ал кезде сканворд, кроссворддорго басым жасап, маалыматты өтө аз камтыган. Убакыттын өтүшү менен гезит улам жаңыланып, пайдалуу, кызыктуу, заманбап жаңылыктар менен толукталып отурган.
Көңүл ачуучу, маанайшат багытка басым жасап, Кыргыз шоу-бизнесинин жаңы тепкичке көтөрүлүшүнө салым кошкон. Гезит түстүү жана сапаттуу басылмага айланып, шоу-бизнестен тышкары коомдогу көйгөйлүү, актуалдуу маселелерге кеңири орун берүүгө өткөн. 2005-жылдан тарта Кыргыз шоу чөйрөсүндөгү жана маданиятындагы инсандардын башын бириктирип, арасынан жыл мыктыларын тандап концерт өткөрө баштаган.

2006-жылы гезиттин сайты www.super.kg ишке кирген. Учурда SUPER.KG порталы өлкөбүздөгү сайттардын алдыңкы сабында.

2007-жылы гезит "Супер сулуу" сынагын негиздеп, өткөрө баштаган. Сынактын башка көптөгөн сынактардан айырмасы – анын стабилдүүлүгүндө, анын адилеттүүлүгүндө, убадалар сөзсүз аткарылып келе жатканында.

2007-жылдан тарта гезит "Улуттук гезит" сыйлыгынын "Жылдын нускасы" наамына татыктуу болуп, "Гезиттик Оскарды" бүгүнкү күнгө чейин татыктуу багынтып келе жатат.

Маданият, маалымат жана туризм министрлигинин Кыргыздын аймагына таркатылган басылмалардын нускасы боюнча жүргүзгөн анализи менен "Супер-Инфо" гезити 2013-жылдын алдыңкы 25 гезитинин 1-катарына чыккан.

2018-жылы "Жылдын тандоосу" фестивалында "Супер-Инфо" "2018-жылдын мыкты гезити" деп тандалган.

Өткөн жылы "Жыл тандоосу - 2019" эл аралык сынагында "Супер-Инфо" Кыргыз өлкөсүндөгү мыкты гезит" деп табылган.

“Супер-Инфонун” расмий Инстаграм баракчасындагы (super_info_official) катталуучулардын саны 1 миллиондон ашат. Өлкөдөгү эң көп нускалуу гезит Кыргыз мамлекетиндеги маалымат каражаттарынын, дегеле компаниялардын арасынан мындай көрсөткүчкө биринчилерден болуп ээ болгон. Гезит Инстаграмда расмий баракчасын 2016-жылы апрель айында ачкан.

Өлкөнүн көпчүлүк гезиттери басылып чыгуучу "Учкун", "ММКларды колдоо борбору" жана "Рубикон" басмаканаларынын маалыматына ылайык, 200дөн ашуун басылмалар нускасы боюнча изилденип чыккан. Маданият, маалымат жана туризм министрлиги "Супер-Инфо" гезитинин өлкөнүн кыргыз тилдүү жана көңүл ачуучу гезиттеринин арасында да биринчи орунду ээлегенин белгилеген. Ошондой эле 2013-жылдын аягында "Супер-Инфо" гезити нускасын 120 миңден ашыруу менен өз рекордун жаңылаган.

31-майга карата жылнаама.