Бишкекте көптөгөн тамактануучу жайлар, соода борборлору жана базарлар санитардык эрежелерди сактабай жатышат. Алар кайсылар?

Бишкек шаарында коронавирус инфекциясына байланыштуу коюлган санитардык талаптарды көптөгөн ишкердик субъекттери аткарбай жатышат. Бул тууралуу Бишкек шаарынын вице-мэри Азиз Алымкулов онлайн брифинг учурунда айтты.

"Тилекке каршы коронавирус инфекциясына байланыштуу кырдаалга бардык эле ишкердик субъекттери ак ниет менен мамиле кылган жок. Муну ачык-айкын айтып кетишибиз керек. Санитардык эрежелерди сактабагандардын ичинде: "Жираф", "Тайм Аут", "Восточка", "Омар не Хайям", "Стамбул", "Ванила" жана башка коомдук тамактануучу жайлары, "Bigser Sport" дүкөнү, "Кудайберген", "Уста" жана "Элит Строй" базарлары, соода борборлору санитардык эрежелерди сактабай жатканы аныкталды", - деди Алымкулов.

Ошондой эле вице-мэр мобилдик топтор тарабынан бардыгы болуп 4 миң 528 объект текшерилгенин, анын ичинен 447сине протокол түзүлүп, жалпы суммасы 1 миллион сомго жакын айып пул салынганын айтты.