Ош шаарында 100 орундуу балдар бакчасынын курулушу башталды (фото)

Ош шаарында 100 орундуу балдар бакчасынын курулушу башталды. Бул тууралуу Ош шаардык мэриясынан билдиришти.

Бүгүн, 2-июнда Ош шаарынын Ак-Тилек кичи районунда бала бакчанын курулушуна капсула салынганы айтылат.

Капсула салуу иш-чарасына Ош шаарынын мэри Таалайбек Сарыбашов катышып, шаарда бала бакчалардын санын көбөйтүүгө аракеттер жүрүп жатканын белгилеген.

“Жергиликтүү бюджеттин эсебинен эки бала бакча курулуп, даяр турат. Жапалактын Арек айылында да бир бала бакча курулуп жатат. Бүгүн Ак-Тилек кичи районунда бала бакча жоктугун эске алып, жаңы бала бакчанын курулушун баштадык. Жакында башка кичи райондорго да курууну баштайбыз. Балдарды бала бакча менен камсыздоо негизги планга коюлган. Өлкө башчыбыздын жарлыгы менен "2020-жыл региондорду өнүктүрүү, өлкөнү санариптештирүү жана балдарды колдоо жылы" деп жарыяланган. Балдарга өзгөчө көңүл бурулат”, - деди ал.

Маалым болгондой, Ак-Тилек кичи районуна курула баштаган 100 орундуу балдар бакчасы жергиликтүү бюджеттин эсебинен салынат. Анын тендердеги баасы 22 миллион 520 миң сомду түзгөнү кабарланат.