"Империя Пиццы", "Шашлычная №1", "Белес", "Тюбетейка"... Бишкекте санитардык талаптарды аткарбаган бир катар тамактануу жайлары аныкталды

Бишкек шаарынын санитардык инспекциясы санитардык нормалардын талаптарын аткарбай иштеп жаткан бир катар тамактануу жайларын аныкташты. Бул тууралуу мэриянын маалымат кызматынан билдиришти.

Ага ылайык, бул жолу санитардык тартипти бузгандардын катарына Бишкектеги "Live Bar", "Фрунзе", "Мира", "Ди-2", "Барскон", "Империя Пиццы", "Белес", "Шашлычная №1" чайханасынын эки филиалы жана "Тюбетейка" ресто-клубу кирген.

"Аталган жайларда 50дөн ашык кардар тейленип, буга кошумча санитардык эрежелер сакталган эмес. Ал эми кафе ээлерине бузуулар кодексине ылайык протокол түзүлүп, айып салынган. Мындай учурда физикалык жактарга 3 миң сом, ал эми юридикалык жактарга 13 миң сом өлчөмүндөгү айып салуу каралган", - деп жазылат маалыматта.