Өзбекстан Volkswagen унааларын чыгара баштайт. Унаалар июлда сатыкка чыгат

Дүйнөгө белгилүү Volkswagen компаниясынын унаалары эми коңшу Өзбекстанда чыга баштайт. Бул тууралуу "Узавтосаноат" ишканасынын басма сөз кызматы билдиргенин жергиликтүү басылмалар жазышууда.

Маалыматка ылайык, "Жизак" автоунаа чыгаруучу заводунда Volkswagen Caddy унаасын чыгаруу башталат. Завод жылына 20 миң автоунаа чыгара алат. Volkswagen Caddy унаасы июлда сатыкка чыгат. Азыркы учурда заводдун курулушу дээрлик аяктап калды.

Коңшу өлкө Volkswagen Caddy автоунаасын эки вариантта чыгарат:

1. 7 кишилик жүргүнчү ташуучу унаа;

2. Жүк ташуучу унаа катары. Унаа 110 аттын күчүнө барабар болот жана кыймылдаткычынын көлөмү 1 миң 600 куб сантиметр. Унаа шаар ичинде 100 чакырымга 9,3 литр, шаардан сыртта болсо 6,1 литр күйүүчү майды сарптайт.

Эске салсак, ушул жылдын март айында "Узавтосаноат" жана "Volkswagen Group Rus" компаниялары Жизак эркин экономикалык аймагында жеңил коммерциялык автоунааларды өндүрүү боюнча келишимге кол коюшкан.