Таласта убактылуу кармоочу жайда отурган 25 жаштагы жаран суицид жасоого аракет кылган

Талас шаарындагы убактылуу кармоочу жайга киргизилген 25 жаштагы жаран суицид жасоого аракет кылган. Ал өзүнүн курсагын жана сол колунун бир нече жерин кесип жиберген. Маалыматты Кыйноолордун алдын алуу боюнча улуттук борборунун аймактык өкүлчүлүгүнүн жетекчиси Нурлан Абдыраимов ырастап, буларга токтолду.

"Окуя 30-майда түндө болуп, 31-майда облустук оорукананын фельдшери өзүнө кол салган жаранга медициналык кароо жасаган. Аталган окуядан кийин 25 жаштагы И.Т. Кара-Буура районундагы убактылуу кармоочу жайына которулган. Бул тууралуу 2-июнда изоляторго барганда белгилүү болду.

Анда өзүнө кол салган жаран ата-энесине кат жазып, алардан кечирим сураган. Ал эмне үчүн мындай кадамга барганын түшүндүргөн жок. Коркутуулар болуп жатканын билдирди, бирок ким тарабынан экенин айткан жок. Бүгүн, 3-июнда баланын апасы келип, ата-энеси уулунун өмүрү үчүн коркуп жатышканын айтты. Ал эми уулу арыз жазуудан баш тартып койду", - деди ал.

Нурлан Абдыраимов бул окуя боюнча топтолгон материалдарды прокуратурага жөнөтөрүн кошумчалады.