Талантбек Исаев, Жол-кайгуул кызматынын башчысы: "МАИчилерди тоготпой качкан Назгүл Чодронованын күнөөсүнө жараша жазасы аныкталат"

"Бишкекте МАИчилерди тоготпой качкан Назгүл Чодронованын күнөөсүнө жараша жазасы аныкталат",- деп билдирди ИИМдин алдындагы Жол-кайгуул кызматынын башчысы Талантбек Исаев. Башкы МАИчи окуя 2 ай мурун болуп, инспекторлор аталган факты боюнча протокол түзүп, каттоого албагандыктан аталган айымга өз учурунда чара көрүлгөн эмес. "Азыр анын жол эрежелеринин канчалык бузганы, башкача айтканда, канчалык чоң эреже бузганы каралууда. Кетирген күнөөсүнө жараша административдик жаза берилет",- деди Исаев.  

Айта кетсек, 9-июнь күнү аталган айым жол эрежесин бузуп, МАИ кызматкерлеринин токтотууга аракет кылган буйругун тоготпой, жол кыймылын көзөмөлдөөчүлөр анын артынан кууп ишине чейин барышкан. Унаадан түшкөн айым "Суранчиевге, Мелис байкеге телефон чалам" деп унаанын номурун чечип алган инспекторду коркутмакчы болгон. Анан бирөөгө телефон чалып, ал эми инспектор командиринин чалуусунан кийин номурду кайтарып берген. Бул окуя тартылган видеотасма бүгүн маалымат булактары аркылуу коомчулукка жарыяланды. 

Өз убагында тийиштүү документ түзүп, чара көрүүгө аракет кылбаган инспекторго да чара көрүлүшү мүмкүн экени айтылууда.

Белгилей кетсек, айдоочулардын минтип жогорку кызматтагыларга таянып МАИ кызматкерлерин тоготпой басып кеткен учурлары биринчи жолу болуп жаткан жок. Ал тургай кол көтөргөн учурлары болот. Эске салсак, быйыл эле ырчы Айгерим Расул кызы да жол эрежесин бузуп, МАИ кызматкерине токтобой качкан. Артынан кууп барган МАИчилердин бири ырчыдан токмок жеген. Ырчынын апасы жол кыймылын көзөмөлдөөчүнүн формасына асылып, тополоң салган.