Нью-Йорк шаарынын мэри нааразычылык акциясына катышкан бардык жарандарды коронавируска тест тапшырууга чакырды

Тектеш кабарлар: Дүйнөгө тараган коронавирус боюнча башка маалыматтар (8923 материал)

АКШнын Нью-Йорк шаарынын мэри нааразычылык акциясына катышкан бардык жарандарга кайрылып, коронавируска тест тапшырууга чакырды. Бул тууралуу шаар мэри Билл де Блазио күндөлүк жыйында билдиргенин чет элдик басылмалар жазып чыгышты.

Мэрдин айтымында, илдетти жуктуруу тобокелчилиги өзгөрүүсүз бойдон калууда. Массалык топтолуулардан улам инфекцияны жуктуруп алгандар көбөйүшү толук мүмкүн. Андыктан жарандарды социалдык аралыкты сактап, медициналык бет кап тагынып жүрүүгө жана 25-майдан бери өтүп жаткан нааразычылык акциясына чыккан болсо, тест тапшыруусуна чакырам деген мэр.

АКШдагы нааразычылык акциясы 25-майда Миннесота штатындагы Миннеаполис шаарындагы полиция тарабынан кармалган 46 жаштагы теги африкалык Жорж Флойддун өлүмүнөн кийин башталган. Флойдду кармаган полиция кызматкери Дерек Човин кыйноо жолу менен аны өлтүрүп койгон. 29-майда полиция кызматкери адам өлтүргөн деген айып менен камакка алынган.