"Бишкекте ата-энелер бала бакчалар кыргыз тилинде болсун деген кайрылууларды жөнөтүп жатышат" дейт билим берүү министринин орун басары

Бүгүн, 8-июнда Жогорку Кеңештин комитет жыйынында депутат Зиядин Жамалдинов бала бакчалар кыргыз тилинде болушу керектинин айтты.

"Бүгүнкү күндө бала бакчалар орус тилинде болуп жатат. Эмне үчүн ошолорду кыргыз тилине өткөрбөйсүздөр? Кыргыз өлкөсүндө жашап, кыргыз тилин билбей калгандар мектептерден, бала бакчалардан чыгып жатат", - деди депутат.

Билим берүү жана илим министринин орун басары Надира Жусупбекова бул багытта түшүндүрүү иштерин жүргүзүп, ата-энелер менен сүйлөшүп жаткандарын айтты. "Ата-энелерде кызыктай түшүнүк болуп жатат. Үйдө кыргызча сүйлөйт, кыргызчаны унутпайт. Бала бакчага барып, орус тилин үйрөнүп алсын деп жатышат. Бул багытта түшүндүрүү иштери жүргүзүлүүдө. Бишкекте ата-энелер бала бакчалар кыргыз тилинде болсун деген кайрылууларды жөнөтүп жатышат", - деди ал.