Депутат Карашев Бабановдун эжесине куран окутушу боюнча: "Ал жерде адам жоготуу, кайгы болуп жатат. Бата кылып келдим"

Бүгүн, 11-июнда экс-депутат Өмүрбек Бабанов эжесине Бишкектеги "Кайнар" ресторанында куран окутканы айтылды.

Куран окутууга барган депутат Аалы Карашев Бабановдун эжесине бата кылып келгенин айтты.

"Бул жерде адам жоготуу, кайгы болуп жатат. Анын эжеси буга чейин өзгөчө абал учурунда каза болгон экен. Барып бата кылып келдим. Ресторанда анчалык деле эл көп болгон жок. Канча экенин так билбейм. Кесиптештерибиз болду", - дейт Карашев.

Буга чейин республикалык штабдын жыйынында Кубатбек Боронов массалык үй-бүлөлүк же салттуу иш-чаралар учурунда COVID-19 инфекциясын жуктургандар көбөйгөнүн айткан.

"Ар кыл үй-бүлөлүк, салттуу иш-чараларга катышкан соң жарандар өздөрү келип кайрылган учурлар көбөйдү. Өткөрүүгө тыюу салууларга, сунуштарга карабастан, жарандар кош көңүл мамиле жасап жана көп санда чогулууну улантышууда. Жыйынтыгында тойлордун, тажыялардын жүрүшүндө илдетке кабылышууда", - деген Боронов.