Режиссёр Ырыс Жоомартова: "Уулум үйлөнүп, тойго конокторду бөлүп чакырып жатабыз"

Режиссёр жана актриса Ырыс Жоомартова уулун үйлөп, келиндүү болуп кубанып турган чагы. Тойду карантин шартында өткөргөн Ырыс айым конокторду ресторанга, үйгө бөлүп чакырууга туура келгенин айтат.

"10-июнда уулум Айбек үйлөнүп, Наргиза аттуу келиндүү болдум. Уулум менен келиним чет өлкөгө жумуштары боюнча кете турган болгондуктан тойду кыска убакытта жасадык. Үлпөт той 10-июнда болуп, анда ресторанга кудаларыбызды, туугандарыбызды жана досторубузду чакырдык. Ресторандын администрациясы коноктордун санын, аты-жөнүн тактап туруп тойканага киргизди. Калган катташтарыбызды үйгө бөлүп чакырып жатабыз", - дейт ал.

"Шаардык келин Шарапат", "Айылдык келин Алёнка", "Сүйүнчү, чоң апам эгиз төрөйт" жана башка тасмаларга режиссёрлук кылган. Ырыс Жоомартованын бир кыз, бир уулу бар.