Күйөөсү аялынын мойнуна таш салынган дөңгөлөк асып, жазалаган окуяны өкмөт көзөмөлгө алды

Жалал-Абад облусунун Сузак районунда күйөөсү тарабынан адаттан тышкары жаза алган аялдын окуясы өкмөттүн көзөмөлүнө алынды. Маалыматты өкмөттүн басма сөз кызматынан кабарлашты.

"Сузактагы үй-бүлөлүк зомбулук фактысын өкмөт көзөмөлгө алды. Бул окуя дүйшөмбү күнү, тагыраагы, 15-июнда аялдар иштери жана гендердик өнүгүү боюнча улуттук кеңештин жыйынында каралат", - деп айтылат маалыматта.

Окуянын чоо-жайы:

12-июнда Фейсбук тармагына эркек кишинин аялды жазалап жаткандагы видеосу тараган. Кийинчерээк, окуя 8-июнь күнү Сузак районундагы айылдардын биринде орун алганы облустук ички иштер бөлүмү тарабынан белгилүү болгон. Анда 51 жаштагы Б.З. үйүндө 47 жаштагы М.Д. аттуу аялынын моюнуна дөңгөлөк байлап, чакалап суу чачкан. Окуя боюнча М.Д. 11-июнь күнү арыз жазып, факт Сузак РИИБинин Кылмыштардын жана жоруктардын бирдиктүү реестрине Жоруктар жөнүндө кодексинин 75-беренеси "Үй-бүлөдөгү зомбулук" менен катталып, тиешелүү материалдар топтолгон соң Жазык кодексинин 144-беренеси (Уруп-согуп кыйноо) болуп өзгөртүлгөн. Күйөөсү 11-июнда Сузак РИИБинин убактылуу кармоочу жайына киргизилген.

13-июнда аялын жазалаган киши райондук соттун чечими менен 15 суткага камакка алынды.