Элчилик: "Орусиядагы жарандарыбыздан мекенге кайтаруу өтүнүчү менен 7 миңден ашуун арыз келип түштү"

Бүгүнкү күндө Орусиядагы Кыргыз жарандардан мекенге кайтаруу өтүнүчү менен 7 миңден ашуун арыз келип түшкөн. Бул тууралуу Кыргыз өлкөсүнүн Орусиядагы элчилиги кабарлайт.

"Ошондой эле ушул жылдын 14-июнунан тартып элчиликтин алдындагы штабына жана колл-борборуна келип түшкөн башка категориядагы жарандардын кайрылуулары дагы кезеги менен каралып баштады. Бүгүнкү күндө элчиликтин дарегине мекенге кайтаруу өтүнүчү менен 7 миңден ашуун арыз келип түштү. Бардык каалоочуларды Кыргыз өлкөсүнө дароо жөнөтүп жиберүү толук мүмкүн эмес. Москвадан апта сайын 2 авиакаттам пландаштырылып жатат (Ошко ишемби күндөрү, Бишкекке жекшемби күндөрү). Ушул жылдын июнь айында Орусиянын региондорунан жана Якутия, Санкт-Петербург, Казандан авиакаттамдарды уюштуруу маселеси боюнча кошумча сүйлөшүүлөр жүргүзүлүп жатат.

Ошондой эле элчилик тарабынан Кыргыз өлкөсүнө мекендештерди жеткирүүдө рейстерди көп орундуу орусиялык учак менен камсыздоо боюнча иш-чаралар жүргүзүлдү. Сүйлөшүүлөрдүн натыйжасында, Бишкекке учуп бара турган 200 орундуу учак 400 орундуу учакка, ал эми Ошко учуп бара турган 176 орундуу учак 300 орундуу учакка алмаштырылды", - деп жазылат маалыматта.