Сузакта коронавирус менен күрөшүүгө берилген каражатты кызматкерлерге бөлүштүргөн факты аныкталып, сотко чейинки тергөө башталды

Жалал-Абадда Сузак райондук оорулардын алдын алуу жана санитардык-эпидемиологиялык көзөмөл борборунун башкы дарыгери менен башкы бухгалтери кызматтык абалынан пайдаланган факты аныкталды. Маалыматты бүгүн, 16-июнда ИИМдин басма сөз кызматынан кабарлашты.

"Сузак райондук оорулардын алдын алуу жана санитардык-эпидемиологиялык көзөмөл борборунун башкы дарыгери 1973-жылы туулган О.С. жана борбордун башкы эсепчиси 1974-жылы туулган М.К. кызматтык абалынан пайдаланып, жергиликтүү мамлекеттик администрациялардын башчыларынын жана облустук акимдердин резервдик фондунан COVID-19 инфекциясынын кесепеттерин болтурбоо жана жоюу боюнча маселелерди тез арада чечүүгө бөлүнгөн 300 миң сом акчаны кызматкерлерге бөлүштүргөн. Тагыраагы, алар каражатты борбордун кызматкерлеринин айлыгына кошуп, материалдык жардам түрүндө беришкен.

Өкмөттүн токтомуна ылайык, резервдик фонддон бөлүнгөн каражатты кызматкерлердин айлык-акысына кошуп бергенге тыюу салынат.

Бул факты Кылмыштардын жана жоруктардын бирдиктүү реестрине 320-берене (кызматтык абалынан кыянаттык менен пайдалануу) менен катталып, сотко чейинки тергөө иштери башталды", - деп айтылат маалыматта.