Казакстанда коронавирустан бир суткада 7 бейтап каза болду

Казакстанда сутка ичинде 350 жарандан коронавирус аныкталып, өлкөдө ооругандардын саны жалпы 15 миң 542ге жетти. Казак басылмаларынын маалыматы боюнча, акыркы суткада 259 бейтап айыгып, ооруканалардан чыгарылса, 7 киши каза болду. Муну менен коңшу өлкөдө айыккандар - 9 миң 647, каза болгондор - 88ге жетти.

Ооруп калганы аныкталган бейтаптардын арасында 6 миң 175 жаранда илдеттин белгилери байкалбай өтүп жатат.

Коңшу өлкөнүн айрым аймактарында эпидемиологиялык абал курч бойдон калууда. Мындан улам бийлик дагы бир аймакта, тагыраагы, Кызылорда облусунда карантин чараларын күчөтүп, бир катар ишмердүүлүктөрдүн ишин токтотту. Ал эми эпидемиологиялык абал турукташканга чейин облус тургундарына эл көп топтолуучу жерлерде медициналык бет кап тагынуу милдеттендирилди.