Коронавирустан дагы 2 бейтап кайтыш болду. Анын бири Бишкектеги базарлардын биринде жашылча-жемиш сатып иштеген 36 жаштагы жаран болгон

Акыркы суткада коронавирустан дарыланып жаткан бейтаптардын ичинен дагы экөө каза болду. Маалыматты саламаттыкты сактоо министринин орун басары Нурболот Үсөнбаев брифинг учурунда билдирди.

"Каза болгондордун бири 1984-жылы туулган. Ал борбордогу базарлардын биринде жашылча-жемиш сатып иштеген. 11-июнда Бишкектен Жалал-Абадга тажияга барган. Маркум Бишкекте жүргөндө эле оорунун белгилери байкалып, өз алдынча дарыланып, антибиотиктерди колдонгону белгилүү болду. Ден соолугуна карабастан Жалал-Абадга барган. 12-июнда абалы начарлап, Жалал-Абад облустук ооруканасына кайрылып, 16-июнда кайтыш болду. Ага эки тараптуу пневмония, коронавирус диагнозу коюлган", - деди Үсөнбаев.

Ал эми экинчи бейтап 16-июнга карата Ош облустук бириктирилген ооруканасында дарыланып жатканда COVID-19 вирусу тастыкталып, рак оорусунан каза болгон 53 жаштагы эркек киши жалпы статистикага киргизилди.

Өлкөдө коронавирус илдетинен кайтыш болгондордун саны 30га жетти.