Бишкектин ооруканаларында коронавирус менен жабыркагандар үчүн орундар жок калдыбы? Жооп

Социалдык тармактарда Бишкектеги клиникалык жугуштуу оорулар ооруканасында коронавируска чалдыккандар үчүн орун жок калды деген маалымат тарады.

Тагыраагы, колдонуучулардын бири өз баракчасында төмөндөгүдөй билдирүү калтырган:

"Коронавируска чалдыккандарды эч жерде кабыл албай жатышыптыр. Бул мүмкүнбү? Учурда ооруканаларда COVID-19 менен жабыркагандарды дарылоо үчүн орундуктар жок. Эгер эртең жакындарыбызга жардам керек болуп калса, кандай болот? Ал эми жасалма дем алдыруучу аппараттар тууралуу айтпай эле коёюн", - деген ал колдонуучу.

Бул тууралуу маалыматты тактоо үчүн Саламаттыкты сактоо министрлигине байланышканыбызда, коронавирус инфекциясына кабылгандарды дарылоо үчүн орундуктар жетиштүү экенин айтышты.

"Жарандар кооптонбой эле койсо болот. Бишкек шаарында жана өлкө боюнча ооруканалар жана андагы орундар бейтаптарды кабыл алууга даяр. Ал эми борбор шаардагы клиникалык жугуштуу оорулар ооруканасы боюнча, алар бир аптага дезинфекциялоо иштерине жабылган. Учурда кайрадан ачылып штаттык режимде иштеп жатышат. Ал жакта коронавируска чалдыккан 22 бейтап дарылануудан өтүп жатат", - деди мекеменин маалымат катчысы.