Коронавирустан 32-бейтап кайтыш болду. Ал бээнин сүтүн ичкенге баргандан кийин дене табы жогорулап, медициналык жайга кайрылган

Бүгүн, 19-июнга карата өлкөдө коронавирустан дарыланып жаткан бейтаптардын бири каза болду. Маалымат саламаттыкты сактоо министринин орун басары Нурболот Үсөнбаев тарабынан белгилүү болду.

"Бейтап 1950-жылы туулган. Ал 25-майда бээнин сүтүн ичкенге барган, 30-майда дене табы көтөрүлүп, жашаган аймагы боюнча медициналык жайга кайрылган.

Кийинчерээк, тагыраагы, 7-июнда бейтап Кыргыз-Түрк ооруканасына которулуп, дарыланып жаткан. Ага эки тараптуу пневмония, дем алуу жетишсиздиги, коронавирус диагнозу коюлган", - деди Үсөнбаев.

Ал эми республикалык штабдан коронавирустан каза болгон жаран 1965-жылы туулган деген маалымат таратты.

Өлкөдө коронавирустан улам каза болгондордун саны 32ге жетти.