Жогорку Кеңештин басма сөз кызматынын жетекчиси коронавирус боюнча 118 кызматына нааразычылыгын билдирди

Жогорку Кеңештин басма сөз кызматынын жетекчиси Ибрагим Нуракун уулу коронавирус боюнча 118 кызматына нааразычылыгын билдирди. Бул тууралуу ал социалдык тармактагы баракчасына жазып чыкты.

"COVID-19 боюнча 118 кызматына нааразычылыгым бар. Телефондон сылык жооп бергениңиздер менен эки күндөн бери менин үй-бүлөмдөн тест албай жатасыздар", - деп жазды Нуракун уулу.

Өкмөттүн басма сөз катчысы Чыңгыз Эсенгулов бул маселе кечээ штабда талкууланганын билдирди. "Буюрса, эртеңден баштап кайра калыбына келет. Бул маселе премьер-министрдин көзөмөлүндө", - деп жооп берди.

18-июнда парламенттин басма сөз кызматынын жетекчиси Ибрагим Нуракун уулунан коронавирус инфекциясы аныкталганы кабарланган. Учурда ал Токмок шаарындагы ооруканада дарыланып жатат.

Буга чейин дагы коомчулукта 118 кызматы сындалып жаткан.